Լիոնել Մեսսին հատեց 300 գոլի սահմանը Բարսելոնայի կազմում: Արգենտինացին արդեն 301 գոլ է հեղինակել և ունի 0.82 գոլ միջին արդյունավետության ցուցանիշ: Չկան անհաղթահարելի ցուցանիշներ, երբ գործի մեջ է Լեո Մեսսին: 25 - ամյա արգենտինացուն 366 խաղ պահանջվեց, որպեսզի հատի 300 գոլի սահմանը: Այդպիսով, ամեն խաղում նա միջինը խփում է 0.82 գոլ: Իր առաջին գոլը կատալոնական թիմում Լեոն խփել է 2005 թվականի մայիսի 1 - ին, Նոու Կամպում գրավելով Ալբասետեի դարպասը, իսկ վերջինը հեղինակեց այս շաբաթ` Գրանադայի դարպասը: Բացի այդ, Մեսսին շարունակում է մեծացնել իր ռեկորդային ցուցանիշը` նա արդեն 14 խաղ անընդմեջ աչքի է ընկել Լա Լիգայում:  Բարսայի 10 համարն ընթացիկ մրցաշրջանում աչքի է ընկել բոլոր այն մրցաշարերում, որոնց մասնակցել և շարունակում է մասնակցել կատալոնական թիմը: Մեսսին արդեն 37 գնդակ է հեղինակել Լա Լիգայի այս մրցաշրջանում և 48 - ը` բոլոր մրցաշարերում: